Paribasa Banjar - “TAHADAPI NASI TAMBAH”

Paribasa Banjar:

“TAHADAPI NASI TAMBAH...”

Di aruh, karasmin atawa basalamatan, urang nang saruan rajin disurungi nasi tambah. Paribasa Banjar, “tahadapi nasi tambah”, artinya lain nasi gasan batambah. Maksudnya sama kaya paribasa “imbah satabul, satabul pulang”: wayah ada masalah, timbul masalah lain.

Takisah, Utuh Tipang wan Aluh Kaciput. Imbah Isya, inya laki-bini tulakan, baimbai nang lain, ka rumah Pambakal Utuh Jagau. Pambakal Utuh Jagau manyambang di muhara lawang, manyuruh warganya naikan, dudukan di palidangan. Aluh Kaciput mandusur ka padang binian.

“Sabalum Magrip, aku sudah manalipun inya,” ujar Pambakal Utuh Jagau. “Matan siang tadi inya ka pasar. Kita musti bamujakarah, supaya inya jangan lagi adu asah.”

Parahatan Pambakal Utuh Jagau bapapadah, banyu satrup wan pupuluran disurung. Sambil basurungan, urang unggut-unggut mandangarakan.

“Ulun wan Utuh Kabuau siap jadi saksi. Sakira inya kada adu asah wan anjur atar lagi,” ujar Utuh Puyau.

Tunggal ikungan, warga baadu-adu, kada katuju lawan parigal Utuh Kalimbuai. Rahatan bakisah, ada nang datang. Pambakal Utuh Jagau sikap mahadapi, manyuruh naik.

“Bapak Pambakal di kampung ini? Utuh Kalimbuai warga Bapak?”

“Betul, tidak salah,” ujar Pambakal Utuh Jagau.

“Bapak ikut kami, untuk memberi kesaksian. Utuh Kalimbuai ditahan. Dia melakukan pencurian. Kami dari kepolisian.”

“Nah, hikamam,” ujar Pambakal Utuh Jagau lawan urang kampung nang cangang. “Tahadapi nasi tambah...”