Paribasa Banjar - “WANI MANIMBAI, WANI MANAJUNI"

Paribasa Banjar:

“WANI MANIMBAI, WANI MANAJUNI...”

Wayah dipawayah, urang bahari bapapadah gasan anak cucu. Papadah wan pitua bahanu “basa barinda”, gasan sangu hidup anak cucunya. Sakira anak cucu salamat dunia ahirat, akur, rukun, rakat mupakat.

“Wani manimbai, wani manajuni”, paribasa Banjar nang sama maksudnya lawan paribasa “sakali manimbai lunta, amun takait haram kada manajuni”. Artinya, urang musti tanggung jawap. Sama artinya lawan paribasa Indonesia: “berani berbuat, berani bertanggung jawab”.

Takisah, Utuh Tipang. Di hujung tahun, hari kada manantu. Bahanu muru, bahanu hujan. Parahatan muru, anaknya nang satangah lusin kada turun ka tanah, mainan di rumah.

“Kamari, Nak,” ujar Utuh Tipang lawan Utuh Halui, anak pangganalnya. “Kiau ading, pintar. Bakumpul lawan Abah. Abah handak bapapadah.”

Utuh Halui maambili adingnya nang mangawani Umanya, Aluh Kaciput, di warung. Imbah maatar anak nang pahaluinya ka dalam rumah, Aluh Kaciput turun pulang ka warung.

“Malam ini malam tahun baru. Tahun Masehi baganti. Isuk tahun hanyar,” ujar Utuh Tipang lawan anaknya nang duduk di higa-mahiga. “Abah-Uma sasain tuha. Bujur kada sugih, Abah-Uma sudah sanggup manggaduh wan mangganalakan anak. Alhamdulillah...”

“Napa, Bah?” ujar Aluh Halui.

“Abah kada maninggali kasugihan,” ujar Utuh Tipang sambil mamusut kapala Aluh Halui. “Sahibar papadah. Mudahan anak Abah bauntung, batuah, baiman. Abah handak, anak Abah jangan tatinggal ibadah. Lawan dingsanak akur-akur. Jangan bacakut papadaan. Jangan pamburisit. Anak Abah musti bujur-harus. Jangan undur mara. Amun sudah dihakuni, gawi. Sakali manimbai lunta, amun takait haram kada manajuni. Wani manimbai, wani manajuni...”