Paribasa Banjar - "IMBAH SATABUL, SATABUL PULANG"

Paribasa Banjar:

“IMBAH SATABUL, SATABUL PULANG...”

“Satabul” sasamaannya “satu”, “sabuah”, “sabakas”, atawa “sabuting”. “Imbah satabul, satabul pulang”, paribasa Banjar gasan pungkala, masalah, bala atawa musibah nang kada bakasudahan. Imbah sabakas, sabakas pulang. Imbah sabuting, sabuting pulang.

Takisah, Utuh Tipang. Sabalum paraian sakulah, anaknya pina rajin. Utuh Halui rajin mancibuk banyu gasan Umanya bababasuh di warung, Aluh Halui rajin mandangani Umanya batatapas. Sakalinya, ada untingan.

Di kalambu, sabalum guring, Aluh Kaciput bapadah lawan Utuh Tipang: “Bah, paraian sakulah kaina kakanakan minta bawai ka anu... napa tih ngarannya... waterboom...!”

Nang ngaran gasan anak, nasi di muntung gin, diluak. Maraha. Sakali samustawa. Utuh Tipang parai bahuma, Aluh Kaciput parai bawarung. Di mutur pikap Utuh Supir, Utuh Tipang wan Aluh Kaciput tulak saparanakan, mambawa anak nang satangah lusin.

Imbah manukar karcis masuk, tumatan jauh Utuh Tipang maniring anaknya nang kahimungan, mandian, mainan banyu wan badungsuran. Aluh Kaciput abut mahagai anak nang bukah-bukah, baajakan, basasahan, tatawaan. Hanyar Utuh Tipang maitihi urang nang lalu lalang, anak-bininya baparak. Anak nang pahaluinya jingkar manangis. Kapalanya bincul tahangkup biding dungsuran.

“Astagfirullah...! Sayang, sayang... Kuuur sumangat...!” ujar Utuh Tipang sambil mangilik, mambisai anaknya. “Ayuha, ari parak sanja, Nak ai. Sadang bulikan.” Imbah anak-bininya basilih baju, inya saparanakan bajurut ka luar, ka mutur Utuh Supir nang mahadangi.

Aluh Kaciput naik badahulu ka pikap, manaikakan anaknya tunggal ikungan. Babaya naik, lintuhut Aluh Halui tahantup biding mutur. Aluh Halui basisigan. Lintuhutnya lingsak.

“Nah, hikamam,” ujar Utuh Tipang. “Imbah satabul, satabul pulang...”